محاكمة أونطة (محاكمات رؤوس النظام السابق )

طول ما القفص فاضي يبقي مفيش متهم... يبقي مفيش محاكمة...يبقي مفيش عدالة....يبقي مفيش داعي.....يبقي مفيش فايدة

هو في محاكمة من غير متهم... حد شاف المتهمين في قفص الاتهام

مرة يقولك دا عنده وعكة...ومرة دا راحت عليه نومة... ومرة دا كان في الحمام (شفيتم ...)

في رايي مثل هذه المحاكمات الصورية هي اشبة بالمسرحيه وهذه أولي فصولها ... محكمة (يقولها حاجب المحكمة)

وبالتالي الفصل الثاني سيكون احد سيناريوهين اما براءة المتهم (اللي هو مش ظاهر علي المسرح ولم يتم الاستعانة حتي بدوبلير) وهذا السيناريو قد لا يلقي ترحيبا من المشاهدين

بل علي العكس يمكن ان يتلقاه المشاهد بالكثير من الجزع والسخط وممكن يضرب كرسي في الكلوب ويبوظ الفرح... اقصد المسرحية.... يووووووه قصدي المحاكمة.

السيناريو الثاني هو الحكم بثبوت التهم وبالتالي توقيع اقصي العقوبة علي المتهمين (امال ايه مش المشاهدين عاوزين كدة والفيس بوك قال كلمته ولا بد من القصاص العادل من القتلة....

بس السؤال هو لو السيرفر بتاع فيس بوك حصل فيه مشكلة والموقع اتعملة صيانة مثلا كدة الموقع هيتعطل لفترة يبقي البلد هتمشي ازاي وانتو عارفين ان فيسبوك هو وسيلة الضغط الحاليه ومنه تأتي القرارات....

والمجلس دلوقتي واخدنا علي قد عقلنا وبيكلمنا من فيس بوك هو كمان... واحد يقولي ممكن نستخدم تويتر مثلا ...عموما هو حل برضة والمجلس برضة يعمل حساب عليه ويفضل يتواصل مع الناس اقصد مع بعض الناس من خلال حساب خاص بيه)

المهم بعد الحكم باقصي عقوبة علي المتهمين وتستمر الاحداث الشيقة والمشاهدين متابعين كل حاجة اون لاين طبعا عن طريق تصريحات واخبار منقولة بأن المتهمين الأن في طريقهم الي سجن كذا بصحبة حراسة كذا وكذا

ومش بعيد يقولك كمان انه يتم الان تنفيذ حكم الاعدام شنقا او رميا بالبلغ في كل من المتهم فلان وفلان طبعا كل دا علي الانترنت ومن خلال الفضائيات التي ايضا تلعب الأن أو يتلاعب بها الأن لتكون أحد الابطال في العرض المسرحي عن طريق التصريحات واللقاءات والمداخلات .... فاصل اعلاني ونعود

عدنا....

فاضل ايه تاني يا تري ....فاضل ايه تاني يا تري .... اه الفصل الثالث

لا داعي لوجود الفصل الثالث لان هذه المسرحية من فصلين فقط

واذا انطلت علينا مثل هذه المسرحيات وهو أيضا احتمال قائم فالأذواق تختلف من فرد لأخر فهناك عطيل وقصة الشتاء وهناك ايضا حزمني يا ... ولكل جمهوره ومعجبينه (متنساش تضغط علي Like)

واذا وصل المعجبين لاكثر من مليون شخص يعدكم ابطال العمل بعرض مسرحي أخر في الصيف القادم بعنوان "احنا أسفين يا ...."

في الأخير اود ان اوجه رسالة لأصحاب هذا العمل المسرحي " هذا الهزل لا ينطلي الا علي البلهاء ونحن شعب قد أفاق من ظلمات الذل والقهر ليجد الامل بانتظاره يسعي الان لتحقيقة لكنه يتعثر ... بدأ مسيرته ولن يتراجع"